Protesta e blegtorëve dhe fermerëve të jugut që filloi në orën 12:00 po vazhdon.
Blegtorët dhe fermerët bllokuan me traktorët e tyre dhe makinat bujqësore aksin rrugor Fier-Lushnjë.
Ata kërkojnë subvencione nga shteti për prodhimin e tyre pasi produktet që vijnë nga importi shiten më çmim më të lirë se produktet vendase.
Fermerët janë nisur me traktorët e tyre nga Kavaja, Vlora, Berati, Fieri dhe Lushnja drejt rrethrrotullimit të Savrës në autostradën Lushnje-Fier. Ata paralajmëruan më parë se në mesditë do të bllokonin autostradën Lushnje-Fier me traktorët e tyre në mënyrë demonstrative për padrejtësinë që, sipas tyre, po u bëhet nga industria e qumështit, për skemat e subvencionimit, dhe një sërë institucionesh të cilat nuk ushtrojnë autoritetin sipas ligjit.
Pankartat e protestës me mbishkrimet: “Duam subvencione si Europa”, “respektoni prodhimin vendas”.
Blegtorët nga Lushnja, Fieri, Berati, Kavaja e Vlora protestuan duke derdhur qumësht në rrugë.
