Fusha e mbetjeve në inceneratorin e Elbasanit u përfshi sot nga flakët duke shkaktuar shtëllunga tymi dhe duke rrezikuar një katastrofë mjedisore në zonën përreth, e cila është një zonë e banuar nga qindra familje.
Vatra e zjarrit duket mjaft aktive dhe burime zyrtare bënë me dije se po punohet nga forcat e shërbimit zjarrfikës për izolimin e saj.
Për momentin nuk janë të qarta shkaqet e rënies së zjarrit, por dyshohet se mbizotërimi i temperaturave mjaft të larta është shkaktari kryesor. Duke qenë se prej kohësh procesi i ndarjes dhe djegies nuk është kryer, fusha e plehrave është e tejmbushur duke u kthyer në katastrofë mjedisore për Elbasanin.
Edhe gjatë verës së 2023, landfilli i Elbasanit u përfshi nga flakët të cilat u shuan pas disa ditësh me ndërhyrjen e qindra forcave te shërbimit zjarrfikës, emergjencave dhe ushtrisë.
