Prej dy javësh Lumi Gjanicë në Fier është në nivel ndotje alarmante. Ujërat e tij janë të mbushura me llumërat e naftës dhe vajit.
Nga Ballshi deri në Seman, uji i lumit ndotet nga hidrokarburet dhe fabrikat e përpunimit të vajit të ullirit, problematikë shumëvjecare ende e pazgjidhur.
Uji është i zi dhe me aromë të rëndë, kryesisht në segmentin lumor në qendrën e qytetit.
Banorët te shqetësuar për situatën fajësojne shtetin , sipas të cilëve është në dijeni të gjëndjes dhe nuk merr masa.
Shoqatat e ambientalisteve ndihen të pafuqishme për të parandaluar gjëndjen, por edhe pse e kanë gjetur çfare e shkakton atë, nuk ndryshojne asgjë.
Qani Rredhi, drejtues i shoqatës së ambientalistëve të Zharrëzës pohon se përveç derdhjeve nga fabrikat e vajit, ne Gjanice shkarkojnë sasira të mëdha naftë në mënyrë të pakontrolluar edhe kompanitë e naftës, ndërsa pika më e nxehtë ndotëse mbetet Ofiçina e Vjetër në Patos. Sipas tij edhe pse Ambientalistët kane njoftuar Agjensinë Rajonale të Mjedisit, duke faktuar edhe emrat e firmave ndotëse, por fajin nuk e merr askush përsipër.
Prej 20 vjetësh lumi Gjanicë ndotet veçanërisht nga mbetjet e naftës të cilat shkarkohen ne det.
Investimi miliona eurosh që është bërë në qendër të qytetit për pastrimin e tij, nuk ka asnjë vlerë në kushtet kur lumi është kthyer në vendgrumbullimin e çdo mbetjeje të lëngshme që ka zhdukur të gjitha gjallesat.
