Gjatë muajve të verës, me qëllim që t’u krijohet hapësirë e bollshme lëvizjes së lirë të qytetarëve gjatë pasditeve, nisur edhe nga fakti se kemi një rritje të popullsisë nga ardhja e emigrantëve, pushteti vendor ka vendosur që rruga e automjeteve, paralel me shëtitoren kryesore, nga poliklinika e qytetit e deri tek monumenti “Toka jonë”, të bllokohet përkohësisht qarkullimi i automjeteve 2 orë në pragmbrëmje.
Ky vendim është në fuqi e është zbatuar edhe vitin e kaluar, një nismë e cila është mirëpritur edhe nga qytetarët.
Bllokimi i lëvizjes së automjeteve në këtë segment rrugor ka filluar që ditën e shtunë 10 qershor dhe do të vazhdojë deri në fund të stinës së verës.
Rruga do të bllokohet në një orar të kufizuar duke filluar nga ora 19:00 deri në orën 21:00 për çdo ditë të javës.
Organet ligjvënëse dhe policia e cila do të monitorojë zbatimin e urdhërit, kërkojnë mirëkuptimin e drejtuesve të automjeteve dhe bëjnë me dije se lëvizja e automjeteve do të funksionojë normalisht, por e devijuar, nga rrethrrotullimi poliklinikës, për të vazhduar në lindje, ku takohet me rrugën që të con mbrapa Shtëpisë Kongresi i Lushnjës e bashkohet me segmentin rrugor prapa bashkisë.