Rreth orës 10 të ditës së sotme, në rrugën hyrëse veriore të qytetit të Lushnjës ndodhi një aksident me pasoja të rënda për shëndetin e dy shtetasve.
Drejtuesi i motocikletës Ledion Duro i cili vinte nga Plugu dhe udhëtonte normalisht drejt qytetit, pikërisht pranë tregut të shumicës të fruta perimeve gjendet në vështirësitë e të papriturës kur i del përpara mjetit këmbësori Gramos Xhumari nga Karbunara dhe si pasojë e goditjes ballore, të dy shtetasit e shohin veten të shtrirë në asfalt me probleme të rënda shëndetësore.
Persona të rastësishëm njoftojnë menjëherë ambulancën dhe policinë rrugore të cilët mbërrijnë në vendngjarje duke u dhënë edhe ndihmën e parë të aksidentuarve.
Ndërkohë që ambulanca i transporton të dy të plagosurit në spitalin e qytetit, policia rrugore bllokon qarkullimin e lëvizjes së automjeteve në sensin ku ndodhi aksidenti dhe orienton lëvizjen e automjeteve për hyrje në qytet në korsinë paralele.
Sipas informacionit që televizioni 4 plus mori nga spitali i qytetit tonë, të dy shtetasit e aksidentuar, për shkak të frakturave të theksuara, janë transportuar në spitalin e traumave në Tiranë dhe aktualisht ndodhen në gjendje të rëndë shëndetësore.
